પ્રાચીન કાળમાં જ્યારે ગોંદવન મહાખંડમાંથી ભૂભાગ ધીરે ધીરે છૂટો પડી રહ્યો હતો ત્યારે ભારત માડાગાસ્કર અને દક્ષિણ અમેરિકાથી છૂટું પડ્યું હતું. આ સમય દરમિયાન નર્મદાની ખીણમાં રાજાસોરસ નર્મદેન્સિસ નામે પ્રજાતિ જોવા મળતી હતી. આ પ્રજાતિ માત્ર ગુજરાતમાં જ જોવા મળતી હતી. ડાયનાસોરની આ નવી પ્રજાતિ વિશેની શોધખોળ વૈજ્ઞાનિકોએ વર્ષ ૨000માં કરી હતી. રાજાસોરસ નર્મદેન્સિસ નામમાં રાજાસોરસ સંસ્કૃત શબ્દ રાજા એટલે કે પ્રમુખ, સર્વોત્તમના અર્થમાં તથા પ્રાચીન ગ્રીક ભાષામાંથી સોરસ એટલે કે ગરોળી એમ ઊતરી આવ્યો છે. નર્મદેન્સિસ અહીં નર્મદા નદીના સંદર્ભે જોવામાં આવે છે. સ્ટેચ્યુ ઓફ યુનિટીના મુલાકાતીઓ માટે વિંધ્ય પર્વતમાળા ખાતે આ રાજાસોરસની પ્રતિકૃતિ તેના વિશેષરૂપે નજરે ચડતા શિંગડાઓ સાથે મૂકવામાં આવી છે. આ પ્રતિકૃતિ મૂળ ડાયનોસોરની સરખામણીમાં ત્રણ ગણા કરતા વધારે વિશાળ બનાવવામાં આવી છે. તેના માથાથી લઈ પૂંછડી સુધી આશરે ૭૫ ફૂટ અને ૨૫ ફૂટની ઊંચાઈની પ્રતિકૃતિ બનાવવામાં આવી છે.