બટરફ્લાય ગાર્ડન

સુંદર અને આકર્ષક રંગબેરંગી પાંખોવાળા પતંગિયાને ઉડતાં જોવા એ એક લહાવો છે. આ ઉપરાંત ફૂલોના પરાગરજને ફેલાવીને પતંગિયા પર્યાવરણ સંરક્ષણમાં પણ મહત્ત્વનો ભાગ ભજવે છે. 
સ્ટેચ્યુ ઓફ યુનિટી ખાતે મુલાકાતીઓ કુદરતની સુંદર અને રંગબેરંગી રચનાને જોઈ શકે, માણી શકે એ માટે ખૂબ જ વિચારપૂર્વક આ બટરફ્લાય ગાર્ડનનું નિર્માણ કરાયું છે.
સ્ટેચ્યુ ઓફ યુનિટીની સામે જ ડેમની ડાબી બાજુએ આ ગાર્ડન બનાવાયો છે. છ એકરમાં ફેલાયેલા આ વિશાળ ઉદ્યાનમાં ૪૫ જાતિના છોડ અને ૩૮ પ્રજાતિનાં પતંગિયાં જોવા મળે છે. પતંગિયા અને પરાગરજની પ્રક્રિયા દર્શાવતા ઈન્ટરએક્ટિવ મોડલ્સ, સેલ્ફી મોડેલ્સ, પ્રાણીઓ અને મનુષ્યના કદની સરખામણી કરતાં મોડેલ્સ ઉદ્યાનના મુખ્ય આકર્ષણો છે. 

બટરફ્લાય ગાર્ડનનું નિર્માણ એ રીતે કરાયું છે કે પતંગિયા આ ઉદ્યાન તરફ આકર્ષાય. આ ઉપરાંત ઉદ્યાન તેમના માટે ઉત્તમ રહેણાંક પુરવાર થાય એવું વાતાવરણ તૈયાર કરાયું છે. પતંગિયા ફૂલોના અમૃત પર જ આધાર રાખે છે એ બાબતને ધ્યાનમાં લઈને અહીં ફૂલોના સેંકડો છોડ રોપાયા છે. આ સિવાય તેઓ ઈંડા મૂકી શકે એ માટે પણ યોગ્ય વાતાવરણ ઊભું કરાયું છે. રંગબેરંગી સુંદર પતંગિયાને નજીકથી નિહાળવા માટે આ બટરફ્લાય ગાર્ડનની મુલાકાત ચોક્કસ લેવી જોઈએ.